Teksa këtë të premte u shënua numri më i lartë i të infektuarve me koronavirus në Shqipëri, presidenti Ilir Meta kërkoi një strategji të re nga qeveria për menaxhimin e pandemisë. Përmes një postimi në “Facebook”, Meta akuzoi mazhorancën se nuk ka bërë aq sa duhet për të parandaluar përhapjen e sëmundjes.

“Pandemia COVID-19 në vendin tonë po del jashtë kontrollit. Në 24 orët e fundit, është regjistruar numri më i lartë i qytetarëve të infektuar, krahasuar me çdo ditë tjetër. Një tjetër shifër tronditëse është shënuar edhe sa i përket jetëve të humbura. Kapacitetet spitalore për të pritur shtrimet e reja ditore, rezultojnë të tejmbushura. Ndërkohë veç propagandës, asnjë plan nuk ka për nisjen e vaksinimit masiv të popullsisë. Duke shprehur shqetësimin më madh për këta tregues të dhembshëm, i bëj thirrje Qeverisë të mos bëjë sehir dhe as mos t’i trajtojë qytetarët, si numra për statistika ditore, duke i lënë në mëshirë të fatit. Çdo shqiptar meriton të trajtohet me dinjitet dhe të ketë të gjithë asistencën e domosdoshme këshillimore dhe shëndetësore nga ana e shtetit, për të përballuar pasojat e rrezikshme të pandemisë. Është e patolerueshme të numërohen çdo ditë të infektuarit dhe jetët e humbura dhe të mos merret asnjë masë për të frenuar COVID-19. Nevojitet urgjentisht, një strategji e re dhe efikase, për të frenuar pandeminë, përmirësuar kushtet në spitale, mbështetur financiarisht të prekurit dhe familjet e tyre dhe rritur nivelin ndërgjegjësues të popullatës.”

Kreu i shtetit u bëri apel edhe qytetarëve që të vijojnë zbatimin me rigorozitet të masave anti-COVID.

Këtë të premte, Ministria e Shëndetësisë konfirmoi 1.089 raste të reja dhe 15 viktima nga COVID-19.